| Friday, July 24th, 2009 | ||
 |
|
Jarang enda keranka anak pandai: Snowdan
SRI AMAN: Semua apai indai jarang enda beratka pelajar enggau pemandai anak sida. Kebuah pia, laban anak ke bisi pemandai engka deka idup senang agi jemah ila, pia ku jaku Kaban Kunsil Nengeri sitak Balai Ringin, Snowdan Lawan.
Ku iya, perintah ngena sistem pelajar ke bisi baka ngena sekula, opis pelajar ba semua renggat, endang semampai merambu pelajar sekula ti pengabis manah sereta strategik ngambika mudah kena bala nembiak ke belajar ba sekula nya mujur dalam pelajar sida.
“Proses pelajar enggau belajar dikarapka enda puntan ba semua sekula, serimbai enggau nyikap bala nembiak enggau penemu, tang ngambika pekara tu nyadi nyata, nembiak enggau pengajar mega enda tau enda bebendar ba pengawa sida belajar enggau ngajar.
“Peresa sekula enggau peresa ari perintah mega manah dikena nakar sereta nyukat lalu nguji tikas pemandai enggau penemu nembiak, kena nentuka tikas penyulut akademik sida siku-siku.
“Nyadi kena napi peresa sida, kelimpah ari ke naka ulih nitihka singkang pelajar dalam kelas, bala nembiak mega dipinta ngiga penemu enggau pemandai alternatif ngambika sida lebih nyulut baka macha bup, internet, tuisen sereta mega enggau ba program motivasi enggau penyulut dalam akademik ke bisi diatur,” ku iya.
Snowdan mansutka jaku nya lebuh ke bejadi penutup Program Motivasi Ujian Penilaian Sekolah Rendah (UPSR) ti diatur Yayasan Sarawak enggau Zon Telagus, Pantu, Sri Aman ditu apin lama.
Ngenang pasal Program Motivasi nya, pengari rayat nya madah, program ti diatur Yayasan Sarawak enggau Zon Telagus nya sebagi ari tanggungjawab begulai ulih kitai semua kena mantu bala anak napi peresa UPSR ila.
Iya madah, gaga bendar ati meda mayuh bendar bala nembiak sama ulih enggau dalam program tu.
Ku iya, tu manah bendar kena mantu bala nembiak ke deka ngambi peresa laban endang deka dibantu ulih bala fasilitator ari bala pengajar ke landik dalam meri lalau enggau sanding penemu ngagai bala nembiak.
Sida nya endang dipilih ulih Opis Pelajar Menua Sarawak kena mantu bala nembiak nyikap diri napi peresa UPSR nya.
Agi mega, iya mega minta bala apai indai nembiak ke nyadi kaban Gerempung Apai Indai - Pengajar sama begembar enggau pengajar ba sekula berakup ngemajuka pelajar bala anak sida ngambika tuju sekula ti deka nyulut dalam akademik ulih japai enggau mudah।
No comments:
Post a Comment